Kuvendi i Republikës së Shqipërisë ka miratuar në Seancë Plenare ligjin e ri “Për mbrojtjen e të dhënave personale”. Ky akt i rëndësishëm rregullator përbën një hop cilësor në garantimin e standardeve më bashkëkohore të mbrojtjes së kësaj të drejte themelore të qytetarëve shqiptarë. Legjislacioni i modernizuar në fushën e mbrojtjes së të dhënave personale është, gjithashtu, përmbushje e një prej detyrimeve në kuadër të procesit të integrimit të vendit në Bashkimin Evropian (BE), duke përafruar plotësisht Rregulloren e Përgjithshme për Mbrojtjen e të Dhënave (GDPR) dhe Direktivën për përpunimin e të dhënave personale nga organet ligjzbatuese (Direktiva e Policisë).
Ky ligj i ri zgjeron dhe pasuron rrethin e të drejtave individuale, për garantimin e të cilave, nëpërmjet përpunimit të ligjshëm të të dhënave personale kërkohet marrja e masave të domosdoshme rregullatore, tekniko-organizative, të sigurisë, çertifikimit, vlerësimit të riskut, trajnimit periodik të stafeve, etj, nga çdo kontrollues/përpunues publik apo privat. Ky ligj sjell risi që ecin paralelisht me zhvillimet teknologjike dhe digjitalizimin e shërbimeve, si: mënyra të reja të dhënies së pëlqimit; e drejta për t’u harruar; konceptet inovative, si transferueshmëria e të dhënave; privatësia në projektim dhe në mënyrë të paracaktuar (privacy by default dhe privacy by design); si dhe do të aplikojë sanksione më të forta për shkeljet e dispozitave të tij. Përafrimi i kuadrit rregullator kombëtar me atë të BE, konsolidon dhe funksionet e Zyrës së Komisionerit për t’iu përgjigjur më mirë sfidave e problematikave të cenimit të privatësisë dhe për mbrojtjen e duhur të të dhënave personale. Kjo qasje e re mbikëqyrëse, sipas modelit të GDPR, ka për qëllim të forcojë pavarësinë institucionale, duke rritur kapacitetet profesionale dhe ato administrative. Funksionimi i duhur i një autoriteti të besueshëm nënkupton thellimin e vazhdueshëm të njohurive, njohjen dhe zbatimin korrekt të procedurave, si dhe vullnetin për të qenë të paanshëm nga ndikimet apo interesat e çdo lloji. Avancimi në rrugën e integrimit evropian, ashtu si edhe konsolidimi i mekanizmave të një shoqërie demokratike me ekonomi të zhvilluar, kërkon një kuadër ligjor bashkëkohor dhe të konsoliduar, i cili ka në themel respektimin e të drejtave dhe lirive të njeriut.
