Komisioneri për të Drejtën e Informimit dhe Mbrojtjen e të Dhënave Personale, z. Besnik Dervishi, ka nënshkruar udhëzimin e përbashkët me Ministrin e Ekonomisë, Kulturës dhe Inovacionit, z. Blendi Gonxhja “Për miratimin e licencës standarde të ripërdorimit të informacionit të sektorit publik”.

Ky udhëzim vjen në mbështetje të nenit 11, pika 2 dhe nenit 22, pika 2, të ligjit nr. 33, datë 31.03.2022 “Për të dhënat e hapura dhe ripërdorimin e informacionit të sektorit publik” dhe ka për qëllim miratimin e licensave për ripërdorimin e të dhënave të hapura në Republikën e Shqipërisë.

Licensat janë të unifikuara me standardet e Bashkimit Evropian dhe i përkasin familjes së licensave Creative Commons CC. Licensat standarde për ripërdorimin e informacionit në sektorin publik do të ofrojnë siguri juridike për përdorimin, në mënyrë që informacionet të përdoren lirisht nga të gjithë, me kushtin kryesor që burimi i të dhënave të citohet sipas kërkesave të licensës. Po ashtu licensa do të jetë në format elektronik dhe do të shoqërojë informacionin që do të publikohet nga organet e sektorit publik dhe sipërmarrjet publike në faqet e tyre zyrtare dhe në portalin e të dhënave të hapura, opendata.gov.al.

Ky udhëzim pas botimit në Fletoren Zyrtare do të zbatohet nga organet e sektorit publik, sipërmarrjet publike në Republikën e Shqipërisë dhe Agjencia Kombëtare e Shoqërisë së Informacionit.