Zyra e Komisionerit për të Drejtën e Informimit dhe Mbrojtjen e të Dhënave Personale, në bashkëpunim me projektin e Bashkimit Evropian për Qeverisjen e Mirë, ka hartuar Komentarin “Mbi kuptimin dhe zbatimin e ligjit për të dhënat e hapura dhe ripërdorimin e informacionit në sektorin publik”. Komentari ka për qëllim lehtësimin e zbatimit të ligjit nr. 33/2022 dhe shërben si një udhëzues praktik për të gjithë organet e sektorit publik ose sipërmarrjet publike për të lehtësuar kuptimin dhe interpretimin e koncepteve të reja që ky ligj prezanton, për të shpjeguar mënyrën se si do të përmbushen detyrimet ligjore në lidhje me të dhënat e hapura dhe ripërdorimin, si dhe mekanizmat që do të përdoren për mbrojtjen, mbikëqyrjen dhe promovimin e të drejtës për ripërdorim.

Ky akt synon t’u vijë në ndihmë, punonjësve të ngarkuar me detyrat e publikimit të të dhënave të hapura dhe ripërdorimin e dokumenteve, si dhe çdo aktori tjetër (biznes, shoqëri civile, media, qytetar) të përfshirë drejtëpërdrejtë apo tërthorazi në këtë proces, të njohin më mirë rregullat e zbatueshme në situata konkrete, me synimin final të krijimit të një sistemi funksional të të dhënave të hapura dhe ripërdorimit të tyre, me qëllim të nxitjes së inovacionit në ofrimin e produkteve dhe të shërbimeve.

Hartimi i këtij Komentari u parapri nga sesion trajnimi për trajnerët (ToT), mbi zbatimin efektiv të ligjit për të dhënat e hapura dhe ripërdorimin e informacionit të sektorit publik nga ekspertët e projektit të Bashkimit Evropian për Qeverisjen e Mirë, e më pas nga një tryezë diskutimi me pjesëmarrjen e përfaqësuesve të organeve të sektorit publik dhe sipërmarrjeve publike. Çështjet e evidentuara gjatë diskutimeve u përfshinë në Komentar, me qëllim sqarimin e çdo aspekti që merr rëndësi në zbatim të ligjit nr. 33/2022.

Lidhja – Komentar për të dhënat e hapura dhe ripërdorimin e informacionit në sektorin publik