Komitetit Ekzekutiv i Konferencës Ndërkombëtare të Komisionerëve të Informimit (ICIC) zhvilloi sot, datë 28 maj 2025 takimin e dytë online për këtë vit.
Ky takim, u drejtua nga Komisioneri për të Drejtën e Informimit dhe Mbrojtjen e të Dhënave Personale z. Besnik Dervishi në cilësinë e Presidentit të këtij Komiteti Ekzekutiv.
Në këtë sesion morën pjesë Komisionerët e së Drejtës për Informim nga vende anëtare si Gjermania, Australia, Argjentina (Buenos Aires), Kenia, Bermuda, Afrika e Jugut, Sierra Leone.
Komisioneri Dervishi vlerësoi punën dhe angazhimin e autoritetit gjerman si mikpritës i radhës i edicionit të XVI të Konferencës Ndërkombëtare të Komisionerëve të Informimit, që do të mbahet në datat 23-25 qershor 2025 në Berlin.
Anëtarët e Komitetit morën disa vendime të rëndësishme lidhur me përzgjedhjen e mikpritësit të edicionit të XVIII-të, që do të zhvillohet në vitin 2027, si dhe lidhur me thirrjen për përzgjedhjen e autoritetit që do të mbajë rolin e Presidentit/Sekretariatit të këtij forumi të rëndësishëm për periudhën 2025-2027. Gjithashtu, anëtarët e Komitetit shqyrtuan kërkesat e tre aplikantëve të rinj për t’iu bashkuar ICIC me statusin e vëzhguesit të cilat u miratuan me konsesus.
Zyra e Komisionerit për të Drejtën e Informimit dhe Mbrojtjen e të Dhënave Personale mbetet e angazhuar në ndjekjen me përgjegjësi të gjitha proceset dhe aktivitetet e këtij forumi të rëndësishëm ndërkombëtar, si dhe përfaqësimin dinjitoz të vendin tonë në arenën e marrëdhënieve ndërkombëtare.
