Bordi Evropian i Mbrojtjes së të Dhënave (EDPB) zhvilloi në Bruksel mbledhjen e 106-të plenare në datat 3 dhe 4 qershor 2025.
Zyra e Komisionerit për të Drejtën e Informimit dhe Mbrojtjen e të Dhënave Personale u përfaqësua në këtë forum nga Komisioneri z. Besnik Dervishi si dhe nga Drejtorja e Kabinetit znj. Besa Velaj.
Në këtë mbledhje u diskutua mbi zhvillimet më të rëndësishme strategjike dhe ndër-rregullatore, transferimet ndërkombëtare të të dhënave, përpunimi i tyre për qëllime kërkimore, zbatimi i nenit 48 të Rregullores së Përgjithshme të Mbrojtjes së të Dhënave (GDPR) dhe ndërveprimi i tij me rregullore të tjera të BE-së, si Akti për Tregun Dixhital (DMA) dhe Rregullorja për Luftën e Pastrimit të Parave.
U trajtua gjithashtu zhvillimi i praktikave të avancuara mbikëqyrëse dhe legjislative, zhvillimet në lidhje me çështje të zbatimit praktik të GDPR, ndikimi i teknologjive të reja – në veçanti të inteligjencës artificiale, – në të drejtat e njeriut dhe mbrojtjen e privatësisë.
Bordi Evropian për Mbrojtjen e të Dhënave (EDPB) është një institucion i pavarur i BE-së, që ka për qëllim zbatimin e Rregullores së Përgjithshme për Mbrojtjen e të Dhënave (GDPR) dhe promovimin e bashkëpunimit mes autoriteteve mbikëqyrëse të mbrojtjes së të dhënave në BE.
Komisioneri për të Drejtën e Informimit dhe Mbrojtjen e të Dhënave Personale, mban statusin e anëtarit vëzhgues të përhershëm në Bordin Evropian për Mbrojtjen e të Dhënave (EDPB) që nga viti 2016. Ky status i mundëson Komisionerit të marrë pjesë rregullisht në mbledhjet e tij periodike, të kontribuojë në diskutime dhe të japë mendime.
