Zyra e Komisionerit për të Drejtën e Informimit dhe Mbrojtjen e të Dhënave Personale, në kuadër të marrëveshjes së bashkëpunimit me Institucionin e Arsimit të Lartë “Kolegji Universitar i Biznesit” kontribuoi nëpërmjet angazhimit të trajnerëve të saj të certifikuar, në trajnimin 6 ditor për programin e formimit dhe kualifikimit profesional të grupit të parë të  Nëpunësve të Mbrojtjes së të Dhënave Personale.

Trajnimi i zhvilluar kishte për qëllim njohjen dhe thellimin në tema si: roli dhe përgjegjësitë e Nëpunësve të Mbrojtjes së të Dhënave Personale, kriteret që duhet të përmbushë një Nëpunës, trajtimi i të drejtave të subjekteve të të dhënave, menaxhimi i rreziqeve dhe auditimi i përpunimit të të dhënave, adresimi i rasteve të cenimit të të dhënave dhe vlerësimi ndikimit në të dhëna, njohje e nocioneve të kontrolluesit, përpunuesit, bashkë kontrolluesve si dhe përgatitja e kontratave midis tyre, transferimi ndërkombëtar i të dhënave, etika, transparenca dhe komunikimi.

Trajnime te tilla profesionale shënojnë ndërtimin e një infrastrukture profesionale që do të garantojë një zbatim më të sigurt, të qëndrueshëm dhe në standard europian të së drejtës për mbrojtjen e të dhënave në Shqipëri.