Në kuadër të projektit të Bashkimit Evropian për Qeverisjen e Mirë, Zyra e Komisionerit për të Drejtën e Informimit dhe Mbrojtjen e të Dhënave Personale, zhvilloi një takim me ekspertët ndërkombëtar mbi fillimin e zbatimit të komponentit të dytë, atë të ofrimit të asistencës për garantimin e zbatimit efektiv të Konventës së modernizuar të Këshillit të Evropës “Për mbrojtjen e individëve në lidhje me përpunimin automatik të të dhënave personale” (Konventa 108+), përfshirë në legjislacionin shqiptar me miratimin e ligjit 49/2022.
Në kuadër të ligjit të ri për mbrojtjen e të dhënave personale, pjesë e kësaj asistence është edhe hartimi i akteve nënligjore mbi certifikimin dhe dhënien e vulave, shenjave të mbrojtjes së të dhënave, si dhe, mbi kriteret shtesë për akreditimin e organizmave të certifikimit.
Më herët, Zyra e Komisionerit përmbushi me sukses komponentin e parë të këtij projekti, atë të forcimit të kapaciteteve institucionale të pikave të kontaktit/koordinatorëve për të drejtën e informimit për zbatimin efektiv të legjislacionit në fushën e të dhënave të hapura dhe ripërdorimit të informacionit publik. Projekti do të përmbyllet me zbatimin e komponentit të tretë që do të ketë në fokus mbështetjen e koordinatorëve për të drejtën e informimit, me qëllim përmirësimin e trajtimit të kërkesave për informacion.
