Nën drejtimin e Komisionerit për të Drejtën e Informimit dhe Mbrojtjen e të Dhënave Personale, z. Besnik Dervishi, u zhvillua mbledhja e katërt plenare e Komitetit Ekzekutiv të ICIC. Në fokus të diskutimeve ishte konstituimi i Komitetit të Planifikimit të Konferencës së vitit 2026. Komiteti vendosi që, për edicionin e ardhshëm të ICIC, në këtë strukturë të përfshihen edhe përfaqësues të shoqatave dhe organizatave ndërkombëtare, përveç anëtarëve të Komitetit Ekzekutiv dhe anëtarëve të ICIC. Ndër këto organizata, u veçuan UNESCO si partner kryesor i komunitetit ICIC, OECD, Qendra për Ligj dhe Demokraci nga Kanadaja, si dhe aktorë të tjerë me rol të rëndësishëm në fushën e së drejtës për informim. Ky vendim synon të pasurojë procesin e planifikimit me ekspertizë të zgjeruar dhe të kontribuojë në hartimin e një programi sa më gjithëpërfshirës për sesionin e hapur të konferencës.
Në këtë sesion morën pjesë gjithashtu përfaqësues të UNESCO-s dhe Autoritetit Britanik të Informimit (ICO), të cilët paraqitën nismën për promovimin e dokumentit të parimeve të së drejtës për informim, të miratuar në Konferencën e Berlinit në qershor 2025. Përfaqësuesi i UNESCO-s paraqiti një panoramë të hapave të parashikuar për avancimin e kësaj nisme dhe kërkoi mbështetjen e anëtarëve të Komitetit Ekzekutiv të ICIC për promovimin e saj në rrugë diplomatike, përfshirë autoritetet shtetërore kompetente, me synimin e miratimit të dokumentit në OKB. Zyra e Komisionerit vlerësoi këtë iniciativë dhe shprehu gatishmërinë për të mbështetur këtë nismë.
Në vijim, Zyra e Komisionerit prezantoi Buletinin Special të ICIC, të hartuar në cilësinë e Presidencës-Sekretariatit të ICIC. Ky produkt përmbledh iniciativat dhe projektet e vendeve anëtare të ICIC në kuadër të kremtimit të Ditës Ndërkombëtare të së Drejtës për Informim (IDUAI) dhe synon të shërbejë si instrument informues për promovimin dhe shkëmbimin e praktikave më të mira ndërkombëtare në këtë fushë.
