Bashkia Pogradec ishte mikpritëse e takimit të tretë konsultues për Projektin e Programit të Transparencës për njësitë e vetëqeverisjes vendore, një nismë e Zyrës së Komisionerit për të Drejtën e Informimit dhe Mbrojtjen e të Dhënave Personale. Takimi u zhvillua pas atyre të mbajtura në Lezhë dhe Shijak, në kuadër të projektit “Mbështetje për Zyrën e Komisionerit”, që zbatohet nga “Bashki të Forta” me asistencën teknike të Institutit për Demokraci dhe Ndërmjetësim (IDM).
Aktivitetin e çeli Kryetarja e Këshillit Bashkiak Pogradec, znj. Manjola Kamolli, e cila uroi mirëseardhje pjesëmarrësve nga administrata dhe këshillat bashkiakë të Korcës, Kukësit, Dibrës, Shijakut, Vlorës, Fierit, Maliqit, Tepelenës, Mallakastrës, Elbasanit dhe Mirditës.
Në fjalën e tij, Komisioneri theksoi se “E drejta e informimit nuk është vetëm një ligj, është kulturë. Kultura e transparencës ndikon në ndriçimin e skutave të errëta të administratës.”
Kryetari i Bashkisë Pogradec, z. Ilir Xhakolli, falënderoi Zyrën e Komisionerit për përzgjedhjen e Pogradecit si mikpritës të këtij takimi, duke e vlerësuar këtë nismë si mjaft të rëndësishmë që ndihmon administratat vendore të forcojnë standardet e transparencës dhe komunikimit me qytetarët.”
Në vijim, z. Fatlum Nurja, ekspert i projektit “Bashki të Forta”, vuri në dukje angazhimin për mbështetjen e bashkive në hartimin dhe zbatimin e Programit të ri Model të Transparencës, ndërsa z. Sotiraq Hroni, drejtor ekzekutiv i IDM, theksoi se “Transparenca është parakusht për mirëqeverisjen dhe Programi i Transparencës është instrumenti që e vendos atë në shina konkrete.”
Nga Zyra e Komisionerit Znj. Emerlinda Pema, Drejtore e Drejtorisë së Monitorimit të Programit të Transparencës prezantoi për të pranishmit Projektin e Programit të Transparencës për njësitë e vetëqeverisjes vendore, duke iu përgjigjur pyetjeve dhe komenteve të pjesëmarrësve.
