Në datat 13-16 tetor 2014, u zhvillua Konferenca e 36-të e Komisionerëve për Mbrojtjen e të Dhënave dhe Privatësinë. Motoja e Konferencës ishte: “Një rend publik për mbrojtjen e të dhënave”.
Zyra e Komisionerit për Mbrojtjen e të Dhënave Personale të Shqiperisë, mori pjesë në sesionin e mbyllur të Konferencës, të rezervuar vetëm për anëtarët e saj si edhe në sesionin e hapur dy ditor, i rezervuar për publikun e gjerë. Gjatë sesionit të mbyllur u diskutuan dhe u miratuan këto dokumente:
• Deklarata e Morisit në lidhje me “Internet of Things”;
• Rezoluta mbi akreditimin për anëtarësim të Autoriteteve të Landit të Bremenit, Ganës dhe Senegalit, dhe me statusin e vëzhguesit: Bermudan, Japoninë, Shtetin e Meksikos, Singaporin dhe Komisionin e Tregtisë së Ardhshme të Shteteve të Bashkuara;
• Rezoluta mbi Big Data-t;
• Rezoluta mbi Implementimin e Bashkëpunimit;
• Rezoluta në lidhje me Privatësinë në erën digjitale.
Komisioneri për Mbrojtjen e të Dhënave Personale të Shqipërisë, z. Besnik Dervishi, zhvilloi takime me homologë të tij, sikurse me Kreun e Autoritetit të Republikës së Kosovës, z. Ruzhdi Jashari; Inspektorin e Përgjithshëm të Republikës së Polonisë, z. Wiewiórowski; Presidentin e Autoriteti të Hungarisë, Dr Attila Péterfalvi, President-Komisionerin Federal të Meksikës, znj. Puente de la Mora, përfaqësuesit e CNIL-it të Francës dhe AFAPDP-së, Komisionerin e Morisit, znj. Madhub, si dhe me delegacionet e Bullgarisë, Italisë, Gjermanisë, përfaqësues të kompanisë Facebook si dhe me delegacione të tjera përfaqësues Autoritetesh dhe kompanish e organizatash ndërkombëtare.
Gjatë këtyre takimeve u diskutua në lidhje me situatën aktuale të punës në institucionet përkatëse, mbi nevojën për bashkëpunim më të ngushtë midis autoriteteve si edhe u shpreh angazhimi i ndërsjellët për zhvillimin e mëtejshëm të marrëdhënieve ndërinstitucionale. Vlen për t’u theksuar se Komisioneri për Mbrojtjen e të Dhënave, z. Dervishi, u ftua nga drejtuesit e Autoriteteve të Italisë, Bullgarisë, Hungarisë por edhe të Polonisë e Kosovës, për të vizituar institucionet e tyre, në kuadër të lidhjeve të bashkëpunimit midis Autoritetesh të Mbrojtjes së të Dhënave.
Së fundmi, Komisioneri për Mbrojtjen e të Dhënave Personale, z. Besnik Dervishi, inicioi edhe bisedimet midis Shoqatës së Autoriteteve Frankofone të Mbrojtjes së të Dhënave (AFAPDP) dhe Autoritetit të Republikës së Kosovës, me qëllim pranimin e këtij të fundit në këtë organizëm, me statusin e vëzhguesit.
