Zyra e Komisionerit për të Drejtën e Informimit dhe Mbrojtjen e të Dhënave Personale paraqet për konsultim publik Projektstrategjinë Institucionale 2026-2030, një dokument që përcakton vizionin, prioritetet dhe drejtimet strategjike të institucionit për pesë vitet e ardhshme.
Projektstrategjia pasqyron sfidat dhe zhvillimet që shoqërojnë veprimtarinë e institucionit, veçanërisht transformimin digjital, procesin e integrimit evropian dhe zgjerimin e kompetencave të Komisionerit. Dokumenti synon të orientojë zhvillimin e mëtejshëm të institucionit si një autoritet i pavarur, efektiv, proaktiv dhe të besueshëm, në përmbushje të mandatit të tij për garantimin e së drejtës për informim dhe mbrojtjen e të dhënave personale. Në këtë kuadër, ajo përcakton prioritetet për promovimin e transparencës përmes të dhënave të hapura dhe konsultimit publik, forcimin e zbatimit të mandatit në fushën e transparencës së veprimtarisë së lobimit, si dhe rritjen e efektivitetit institucional dhe zhvillimin e kapaciteteve organizative.
Prioritetet strategjike shoqërohen me masa konkrete dhe tregues performance, të përcaktuar në Projektstrategji dhe në Planin e Veprimit 2026-2027. Zbatimi i tyre do të ndiqet përmes mekanizmave të monitorimit, raportimit periodik dhe vlerësimit të rezultateve.
Në kuadër të procesit të konsultimit publik, Zyra e Komisionerit fton institucionet publike, sektorin privat, organizatat e shoqërisë civile, median, akademinë, ekspertët, qytetarët dhe të gjithë aktorët e interesuar të njihen me Projektstrategjinë përmes kësaj lidhjeje: “Strategjia e Komisionerit për të Drejtën e Informimit dhe Mbrojtjen e të Dhënave Personale 2026 – 2030” dhe të japin komentet dhe sugjerimet e tyre.
Konsultimi publik do të jetë i hapur nga data 8 deri më 18 shtator 2026, periudhë gjatë secilës mund të dërgohen në adresën elektronike info@idp.al komentet dhe sugjerimet.
Pjesëmarrja dhe kontributi i palëve të interesuara janë të rëndësishme për finalizimin e një dokumenti strategjik gjithëpërfshirës, të zbatueshëm dhe të orientuar drejt forcimit të transparencës, integritetit, llogaridhënies dhe mbrojtjes efektive të të drejtave të qytetarëve.
