Shkolla “Transparenca dhe Qeverisja e Hapur 2024” është një program i Fakultetit të Drejtësisë të Universitetit të Tiranës, që ka në fokus jo vetëm njohjen me kuadrin ligjor kombëtar por edhe zbatimin e tij në praktikë nga profesionistët e së ardhmes.

I ftuar në këtë aktivitet ishte edhe Komisioneri për të Drejtën e Informimit dhe Mbrojtjen e të Dhënave Personale, z. Besnik Dervishi, i cili mbajti një leksion të hapur për garantimin e të drejtës për informim në vendin tonë dhe mbi rolin e veprimtarinë institucionale në këtë fushë. Në prezantimin e tij, Komisioneri vlerësoi se procesi i transparencës së autoriteteve publike rrit përgjegjshmërinë e tyre, nxit llogaridhënien e vazhdueshme dhe mundëson pjesëmarrjen efektive të qytetarëve në qeverisje. Në këtë këndvështrim, ai theksoi se edhe digjitalizimi i shërbimeve publike është shumë i rëndësishëm dhe i domosdoshëm për ta forcuar akoma edhe më shumë në praktikë konceptin e transparencës.

Në kuadër të këtij bashkëpunimi, një grup studentësh pjesëmarrës në këtë Shkollë, ishin të pranishëm gjatë zhvillimit të seancave dëgjimore me autoritete publike. Njëkohësisht, ata u njohën edhe me kuadrin ligjor në fushën e mbrojtjes së të dhënave personale, procesin e modernizimit të tij dhe me trajtimin e rasteve konkrete. Në këtë mënyrë, Zyra e Komisionerit jep kontributin e saj në formimin sa më të plotë me njohuri dhe praktikat më të mira, në funksion të garantimit të të drejtave dhe lirive themelore të qytetarëve.