Më datë 10 mars 2025, u zhvillua takimi i parë për vitin 2025 i Komitetit Ekzekutiv të Konferencës Ndërkombëtare të Komisionerëve të Informimit (ICIC). Ky takim shënoi edhe organizimin e parë të kryesuar nga Zyra e Komisionerit për të Drejtën e Informimit dhe Mbrojtjen e të Dhënave Personale në rolin e saj si Presidencë dhe Sekretariat i ICIC.
Takimi, i cili u zhvillua online, u drejtua nga Komisioneri z. Besnik Dervishi dhe mblodhi përfaqësues të autoriteteve për të drejtën e informimit nga vende të ndryshme si Gjermania, Australia, Bermuda, Afrika e Jugut, Sierra Leone, si edhe Shqipëria.
Në hapje të punimeve, Komisioneri Dervishi mbajti një fjalë përshëndetëse, duke theksuar rëndësinë e bashkëpunimit ndërkombëtar në forcimin e transparencës dhe të drejtës për informim. Pjesë e rendit të ditës ishte miratimi i minutave të takimit të mëparshëm të Komitetit Ekzekutiv, prezantimi nga autoriteti mikpritës për përgatitjet e Konferencës së radhës që do të zhvillohet në Berlin, Gjermani, në qershor 2025, si dhe diskutimi mbi thirrjet për presidencën e re të ICIC dhe autoritetin mikpritës për vitin 2027.
Gjithashtu, anëtarët e Komitetit shqyrtuan aplikimin e një autoriteti për t’iu bashkuar ICIC, si dhe diskutuan mbi çështje të tjera të rëndësishme që lidhen me funksionimin e këtij forumi ndërkombëtar.
Zyra e Komisionerit për të Drejtën e Informimit dhe Mbrojtjen e të Dhënave Personale mbetet e angazhuar në përmbushjen e detyrave të saj si Presidencë dhe Sekretariat i ICIC, duke ndjekur me përgjegjësi të gjitha proceset dhe aktivitetet e këtij forumi të rëndësishëm ndërkombëtar.
