Zyra e Komisionerit për të Drejtën e Informimit dhe Mbrojtjen e të Dhënave Personale (KDIMDP) me ftesë të Qendrës së Kapaciteteve Kibernetike të Ballkanit Perëndimor (WB3C) zhvilloi trajnimin 2 ditor mbi njohjen e Rregullores së Përgjithshme për Mbrojtjen e të Dhënave Personale (GDPR). Në trajnimin ku morën pjesë Nëpunës të Mbrojtjes së të Dhënave (DPO) të institucioneve publike në Ballkanin Perëndimor, Zyra e Komisionerit ofroi ekspertizë në fushën e mbrojtjes së të dhënave personale, në kuadër edhe të miratimit të ligjit nr. 124/2024 “Për mbrojtjen e të dhënave personale” dhe përafrimit të plotë të tij me GDPR.
Trajnimi u drejtua nga Sekretarja e Përgjithshme e Komisionerit për të Drejtën e Informimit dhe Mbrojtjen e të Dhënave Personale, znj. Blerta Xhako dhe kishte si qëllim njohjen e audiencës me Rregulloren e Përgjithshme për Mbrojtjen e të Dhënave Personale dhe konkretisht, kuadrin rregullator, të drejtat e subjekteve të të dhënave, detyrimet e kontrolluesve gjatë procesit të përpunimit, rolin e DPO-ve, menaxhimin e riskut dhe sigurinë e informacionit, etj.
Sekretarja e Përgjithshme e KDIMDP-së znj. Blerta Xhako, diskutoi edhe me drejtorin e Qendrës së Kapaciteteve Kibernetike të Ballkanit Perëndimor z. Gilles Schwoerer mbi përpjekjet e vazhdueshme të vendeve të rajonit në përafrimin e plotë të legjislacionit të mbrojtjes së të dhënave me standardet e Bashkimit Evropian.
