Zyra e Komisionerit për të Drejtën e Informimit dhe Mbrojtjen e të Dhënave Personale në kuadër të ligjit nr. 33/2022 “Për të Dhënat e Hapura dhe Ripërdorimin e Informacionit të Sektorit Publik” me mbështetjen e projektit të Bashkimit Evropian TAIEX ka zhvilluar trajnimin e radhës me 38 autoritete publike në vend. Këto organe në zbatim të këtij ligji do të duhet të bëjnë publike në faqet e tyre zyrtare, por dhe në portalin “opendata.gov.al” të dhënat e tyre, me qëllim ripërdorimin e këtyre dokumenteve/informacioneve nga publiku, media, organizata, biznese apo edhe kërkues shkencorë.
Qëllimi i këtij trajnimi ishte ofrimi asistencës teknike dhe këshillimore për organet e sektorit publik nga ekspertët ndërkombëtarë, duke vlerësuar kuadrin aktual ligjor dhe institucional. Gjatë trajnimit u identifikuan të dhënat publike, standardet dhe formatet e të dhënave të hapura, llojet e licensave, u dhanë udhëzime praktike mbi përgatitjen e një plani veprimi për të dhënat e hapura në institucione, si dhe u sqarua kuptimi mbi të drejtën për ripërdorimin e informacionit të sektorit publik.
Drejtorja e Përgjithshme për të Drejtën e Informimit znj. Elona Hoxhaj, në fjalën e hapjes theksoi se, sasia e të dhënave publike në vendin tonë është rritur ndjeshëm e për pasojë ripërdorimi i këtyre të dhënave të hapura i shërben rritjes së transparencës, përgjegjshmërisë së administratës, kërkimit shkencor dhe zhvillimit ekonomik mbi zgjidhje inovatore. Znj. Hoxhaj shtoi më tej se, të dhënat e hapura përfshijnë një riorganizim dinamik të pushtetit të sektorit publik, duke hequr dorë nga roli i tij si “mbajtës i informacionit” dhe duke e ridimensionuar atë në një rol të ri, atë të “ofrimit të informacionit”.
Ekspertët e projektit TAIEX u shprehën se, Shqipëria ka një kornizë të mirë ligjore, por duhet të përmirësojë cilësinë e të dhënave dhe përditësimin e tyre. Përmes trajnimeve periodike do të arrihet dhe ky rezultat. Sipas ekspertëve, të dhënat e hapura janë një e mirë publike, e cila duhet përdorur ndërsa sollën në vëmendje se duhet bërë dallimi mes të drejtës për informim dhe të dhënave të hapura dhe ripërdorimi i tyre.
Ekspertja e Zyrës së Komisionerit znj. Alketa Sata, sqaroi përfaqësuesit e autoriteteve publike në lidhje me fazat që do të kalojë ky proces, duke theksuar se aktualisht Zyra e Komisionerit është në fazën e orientimit dhe ndërgjegjësimit e më pas do të kalohet në fazën e monitorimit për zbatimin e ligjit.
Zyra e Komisionerit ka bashkëpunuar edhe me herët me ekspertët e projektit “Bashkimi Evropian për Qeverisjen e Mirë”. Pjesa e parë e këtij projekti, i dedikohej zbatimit efektiv të ligjit nr. 33/2022 “Për të dhënat e hapura dhe ripërdorimin e informacionit të sektorit publik”. Produkt i këtij bashkëpunimi ishte edhe hartimi i Komentarit për të dhënat e hapura, i cili përmban informacion të detajuar mbi parashikimet e ligjit nr. 33/2022, kompetencat e Zyrës së Komisionerit dhe detyrimet e organeve të sektorit publik dhe sipërmarrjeve publike lidhur me implementimin dhe zbatimin e këtij ligji. Ky Komentar është publikuar në faqen zyrtare të Zyrës së Komisionerit, ( https://shorturl.at/cpAFb ) dhe i është dërguar të gjithë organeve të sektorit publik dhe sipërmarrjeve publike për njohje dhe zbatim. Komentari u bë pjesë e diskutimit në këtë aktivitet nga ekspertet dhe pjesëmarrësit.
