Zyra e Komisionerit për të Drejtën e Informimit dhe Mbrojtjen e të Dhënave Personale, në cilësinë e autoritetit mbikëqyrës fton të gjithë operatorët e sektorit të turizmit të marrin pjesë në takimin me temë “Mbrojtja e të dhënave personale, standard i domosdoshëm për sektorin e turizimit”, që do të zhvillohet në datën 20 tetor 2026 ora 10:00, në sallën Antigonea 1, në Rogner Hotel Tirana.
Mbrojtja e të dhënave personale është një përgjegjësi ligjore dhe një element i rëndësishëm i besimit në shërbimet turistike. Në këtë kuadër, takimi do të sjellë në vëmendje, gjetjet kryesore të hetimeve administrative të realizuara nga Zyra e Komisionerit në këtë sektor, rekomandimet dhe masat për përmirësimin e praktikave të përpunimit të të dhënave personale.
Gjithashtu, vëmendje e veçantë do t’i kushtohet sfidave që lidhen me digjitalizimin dhe përdorimin e inteligjencës artificiale në shërbimet turistike.
Pjesëmarrësit do të njihen me orientime për përmbushjen e detyrimeve që burojnë nga ligji nr. 124/2024 “Për mbrojtjen e të dhënave personale”, duke pasur mundësi të diskutojnë hapur mbi problematikat dhe sfidat që hasin në veprimtarinë e tyre.
Operatorët turistikë inkurajohen të përfaqësohen në këtë takim nga një drejtues i subjektit dhe nëpunësi përgjegjës për mbrojtjen e të dhënave personale.
Për të konfirmuar pjesëmarrjen, lutemi të dërgoni një email në adresën info@idp.al, deri më 16 tetor 2026, duke specifikuar emrin e subjektit që përfaqësoni, si dhe emrat dhe funksionet e pjesëmarrësve.
