“E Drejta për Informim dhe Mbrojtja e të Dhënave Personale” ishte tema e një trajnimi të zhvilluar për stafin e Zyrës së Komisionerit, në bashkëpunim me Shkollën Shqiptare të Administratës Publike. Aktiviteti kishte në fokus rritjen e kapaciteteve profesionale të punonjësve të institucionit, duke forcuar më tej zbatimin efektiv të ligjit dhe shërbimin ndaj publikut.
Trajnimi u udhëhoq nga dy trajneret e certifikuara, znj. Elona Hoxhaj dhe znj. Pjerina Mema, të cilat mbajnë edhe funksionin e drejtoreshave të përgjithshme në fushat e informimit dhe të dhënave personale pranë Zyrës së Komisionerit. Ato ndanë njohuritë e tyre të specializuara, duke sjellë jo vetëm sqarime teorike, por edhe raste konkrete nga praktika e përditshme, që ndihmojnë në kuptimin dhe zbatimin e legjislacionit.
Pjesëmarrësit u njohën me rëndësinë e dy ligjeve themelore në këtë fushë:
- Ligjin nr. 119/2014 “Për të drejtën e informimit”;
- Ligjin e ri nr. 124/2024 “Për mbrojtjen e të dhënave personale”.
Në aspektin e informimit, u theksuan tema si: e drejta e qytetarëve për informim dhe transparencë, roli i koordinatorit për të drejtën e informimit, kufizimet ligjore në aksesin ndaj informacionit publik, si dhe procedurat që ndjek Zyra e Komisionerit për shqyrtimin e ankesave.
Ndërkohë, pjesa e mbrojtjes së të dhënave personale u përqendrua në parimet e përpunimit ligjor të të dhënave, të drejtat e subjekteve, detyrimet e kontrolluesve dhe përpunuesve, si dhe çështjet që lidhen me transferimin ndërkombëtar të të dhënave. Znj. Mema solli një përmbledhje të risive që sjell ligji i ri, në krahasim me legjislacionin e mëparshëm, duke sqaruar kompetencat e zgjeruara të Komisionerit në këtë fushë.
Për të lehtësuar kuptueshmërinë e ligjeve, trajneret sollën shembuj praktikë, të cilët pasqyrojnë sfidat dhe zgjidhjet më të shpeshta në punën e përditshme të administratës. Në përfundim, u theksua se Zyra e Komisionerit organizon rregullisht aktivitete të tilla, si pjesë e përpjekjeve për përmirësimin e vazhdueshëm të punës dhe për të garantuar një zbatim sa më efektiv të ligjeve që mbrojnë të drejtat e qytetarëve.
