Në Ditën Ndërkombëtare të të Drejtës për Informim, Konferenca Ndërkombëtare e Komisionerëve të Informimit (International Conference of Information Commissioners–ICIC) njoftoi bashkëpunimin me UNESCO (Organizatën e Kombeve të Bashkuara për Edukimin, Shkencën dhe Kulturën) dhe organizma të tjerë ndërkombëtar për promovimin e kësaj të drejte themelore të njeriut.
Zyra e Komisionerit për të Drejtën e Informimit dhe Mbrojtjen e të Dhënave Personale, anëtare e akredituar e kësaj organizate (ICIC), përshëndet këtë bashkëpunim dhe shpreh bindjen se kjo iniciativë është modeli më i mirë për të forcuar transparencën dhe llogaridhënien e Autoriteteve Publike shqiptare.
“Komisionerët e Informimit luajnë rol kyç në vënien e autoriteteve publike para përgjegjësisë, që këto të fundit të garantojnë regjistrimin dhe menaxhimin në mënyrën e duhur të informacionit, përpunimin e saktë të tij dhe respektimin e aksesit në informacion, publikimin në mënyrë proaktive dhe detyrimet e tjera ligjore, sidomos në një situatë emergjence publike” – theksohet në këtë deklaratë.
