Komisioneri për të Drejtën e Informimit dhe Mbrojtjen e të Dhënave Personale, Besnik Dervishi, zhvilloi një takim me Norbert Pijls, drejtues i projektit “Bashki të Forta”,  ku në fokus të diskutimeve ishte forcimi i transparencës dhe përmirësimi i qeverisjes në nivel vendor.

Gjatë takimit u diskutuan mënyra konkrete bashkëpunimi për rritjen e aksesit në informacion, përmirësimin e qeverisjes së të dhënave dhe forcimin e llogaridhënies në njësitë e vetëqeverisjes vendore. Në këtë kuadër, u theksua se bashkitë transparente përbëjnë një element thelbësor për ndërtimin e besimit publik dhe për nxitjen e pjesëmarrjes aktive të qytetarëve në vendimmarrje.

Palët shqyrtuan mundësitë për të harmonizuar mbështetjen teknike, ngritjen e kapaciteteve dhe zhvillimin e dialogut të politikave, me qëllim fuqizimin e institucioneve vendore për të përmbushur detyrimet e tyre për transparencë në një mjedis gjithnjë e më të orientuar nga të dhënat.

Zyra e Komisionerit vlerëson bashkëpunimin me projektin “Bashki të Forta” dhe rikonfirmon angazhimin e saj për të vijuar përpjekjet në mbështetje të një administrate vendore më transparente, më llogaridhënëse dhe më të përgjegjshme ndaj qytetarëve.