Komisioneri për të Drejtën e Informimit dhe Mbrojtjen e të Dhënave Personale, z. Besnik Dervishi dhe Drejtorja e Përgjithshme për Mbrojtjen e të Dhënave znj. Pjerina Gaxha, morën pjesë në punimet e Mbledhjes së 48-të Plenare të Komitetit Konsultativ të Konventës për mbrojtjen e individëve lidhur me përpunimin automatik të të dhënave personale (Konventa 108), të zhvilluara në Strasburg.
Në këtë mbledhje, u trajtuan çështje kyçe në fushën e mbrojtjes së të dhënave personale në kontekstin e zhvillimeve teknologjike dhe juridike globale. Pikat kryesore të diskutimit përfshinë:
- Rrjedhat ndërkufitare të të dhënave personale, me fokus te zbatimi i Klauzolave Kontraktuale Model (Model Contractual Clauses – MCC), vendet që i kanë miratuar ato, si dhe nevojat për zhvillimin e mjeteve të reja për të lehtësuar shkëmbimet ndërkombëtare të të dhënave. Sekretariati prezantoi gjithashtu një nisëm të re për një dialog shumëpalësh mbi transferimet e të dhënave.
- Interpretimi i Nenit 11 të Konventës së modernizuar 108, që lidhet me kufizimet e mundshme të të drejtave për mbrojtjen e të dhënave, ku Komiteti shqyrtoi draft-udhëzimet përkatëse dhe u ftua të miratonte dokumentin për publikim.
- Mbrojtja e të dhënave në kontekstin e Modeleve të Mëdha Gjuhësore (LLMs), ku u trajtuan rreziqet e privatësisë dhe përpunimit të të dhënave që burojnë nga përdorimi i teknologjive të avancuara të inteligjencës artificiale.
Komiteti mori gjithashtu në shqyrtim informacionin mbi bashkëpunimet ndërinstitucionale brenda Këshillit të Evropës, zhvillimet më të fundit në fushën e mbrojtjes së të dhënave në vendet pjesëmarrëse, si edhe projektet aktuale të bashkëpunimit në këtë fushë.
Gjatë këtij sesioni, përfaqësuesit e shteteve anëtare të Këshillit të Evropës në Komitet, zgjodhën me votim edhe Komisionerin për Mbrojtjen e të Dhënave Personale të Këshillit.
Pjesëmarrja në këtë tryezë të rëndësishme ndërkombëtare rikonfirmon angazhimin e Shqipërisë për të ndjekur standardet më të larta të mbrojtjes së të dhënave personale dhe për të qenë pjesë aktive në zhvillimet globale që ndikojnë drejtpërdrejt të drejtat e individëve në epokën dixhitale.
