Zyra e Komisionerit për të Drejtën e Informimit dhe Mbrojtjen e të Dhënave Personale (KDIMDP), zhvilloi trajnimin e radhës me ekspertët ndërkombëtarë të projektit TAIEX mbi zbatimin efektiv të ligjit nr. 33/2022 “Për të dhënat e hapura dhe ripërdorimin e informacionit të sektorit publik”.
Në këtë sesion trajnimi, stafi i Zyrës së Komisionerit përfitoi njohuri të zgjeruara mbi të dhënat e hapura si:
- Identifikimi dhe përgatitja e të dhënave për publikim në format të hapur;
- Kriteret e publikimit të të dhënave të hapura;
- Llojet e licensave;
- Mbikëqyrja e zbatimit të ligjit nga ana e Komisionerit;
- Prezantim praktik për menaxhimin e mosmarrëveshjeve lidhur me ripërdorimin.
Gjithashtu, gjatë trajnimit, ekspertët parashtruan raste studimore dhe vendime të bazuara në praktikat e Bashkimit Evropian.
Komisioneri për të Drejtën e Informimit dhe Mbrojtjen e të Dhënave Personale shprehu mirënjohjen e tij ndaj mbështetjes së Bashkimit Evropian dhe ekspertëve kroat. Z. Dervishi theksoi se këto trajnime i shërbejnë përmirësimit të vazhdueshëm të punës së Komisionerit në funksion të zbatimit sa më efektiv të ligjit.
Ekspertët kroatë u shprehën se ripërdorimi i informacionit të sektorit publik i shërben vendit dhe shoqërisë.
Trajnimi me ekspertët ndërkombëtarë për stafin e Zyrës së Komisionerit kontribuon në përmbushjen e detyrimeve sipas ligjit nr. 33/2022 “Për të Dhënat e Hapura dhe Ripërdorimin e Informacionit të Sektorit Publik”, konkretisht neni 19 “për mbrojtjen, mbikëqyrjen dhe promovimin e të drejtës për ripërdorimin e dokumenteve sipas këtij ligji.”
