Komisioneri për të Drejtën e Informimit dhe Mbrojtjen e të Dhënave Personale në zbatim të nenit 19 të ligjit nr. 33/2022 “Për të dhënat e hapura dhe ripërdorimin e informacionit të sektorit publik” është institucioni përgjegjës për mbrojtjen, mbikëqyrjen dhe promovimin e së drejtës për ripërdorimin e dokumenteve, si dhe për shqyrtimin e ankesave për mosrespektimin e këtij ligji.

Në zbatim të kësaj kompetence Zyra e Komsionerit monitoron dhe mbikëqyr zbatimin e ligjit për të dhënat e hapura nga organet e sektorit publik dhe sipërmarrjet publike, si dhe bashkëpunimi me to përbën një nga aspektet më të rëndësishme në drejtim të garantimit të përmbushjes së qëllimit të ligjit.

Me qëllim ndërgjegjësimin e organeve të sektorit publik dhe sipërmarrjeve publike por edhe të mbledhjes së të dhënave dhe krijimit të statistikave, Zyra e Komisionerit ka hartuar një pyetësor mbi zbatimin e ligjit nr. 33/2022, të cilin e gjeni sipas lidhjes.
Shkarko Pyetësorin

Ky pyetësor do të dërgohet me e-mail pranë organeve të sektorit publik dhe sipërmarrjeve publike.

Organet e sektorit publik dhe sipërmarrjet publike nëpërmjet këtij pyetësori do të kuptojnë edhe disa nga detyrimet që ato kanë në zbatim të ligjit nr. 33/2022 “Për të dhënat e hapura dhe ripërdorimin e informacionit të sektorit publik”.

Pyetësori do të plotësohet dhe dërgohet pranë Zyrës së Komisionerit në adresën info@idp.al.