|

Youtube X-twitter Instagram Linkedin

|

Youtube X-twitter Instagram Linkedin
Youtube X-twitter Instagram Linkedin

TË DHËNAT TUAJA

Të dhënat personale janë të gjitha informacionet që lidhen me ju si individë. Këto të dhëna mbrohen nga ligji nr. 124/2024 “Për mbrojtjen e të dhënave personale”.

Megjithatë, të gjithë ne duhet të jemi të kujdesshëm për informacionet që japim për veten dhe të përpiqemi t’i mbrojmë ato në çdo formë. Ne japim të dhënat tona në çdo kohë, kur regjistrohemi në një kompani sigurimesh, kur marrim një kartë klienti në një supermarket, kur bëhemi klientë të kompanive të telefonisë së lëvizshme, kur aplikojmë për punë, për shkollën, apo kur i drejtohemi qendrave shëndetësore, si dhe në shumë raste të tjera.

Më poshtë, do të gjeni përkufizimet për të dhënat personale, sipas nenit 5 të ligjit nr. 124/2024 “Për mbrojtjen e të dhënave personale”.

  • “Subjekt i të dhënave personale”
    është çdo person fizik i identifikuar ose i identifikueshëm. Një person është i identifikueshëm nëse mund të arrihet në identifikimin e tij, duke iu referuar drejtpërdrejt ose tërthorazi një apo disa faktorëve identifikues të veçantë, si: emri, numri i identifikimit, të dhënat për vendndodhjen, një identifikues në internet, ose një apo më shumë faktorëve specifikë, lidhur me identitetin e tij fizik, fiziologjik, identitetin gjenetik, mendor, ekonomik, kulturor ose shoqëror.
  • “Pëlqim”
    është çdo element tregues i vullnetit të subjektit të të dhënave, i dhënë lirisht, i informuar dhe i qartë, nëpërmjet të cilit ai, me anë të një deklarate ose me çdo lloj shfaqjeje tjetër të padyshimtë pohuese të vullnetit, shpreh dakordësinë për përpunimin e të dhënave personale, që lidhen me të për një ose më shumë qëllime specifike.
  • “Përpunim i të dhënave personale”
    është çdo veprim ose një grup veprimesh, që kryhet mbi të dhënat personale ose grupe të dhënash personale, pavarësisht nëse kryhen me mjete të automatizuara ose jo, të tilla, si: mbledhja, regjistrimi, organizimi, strukturimi, ruajtja, përshtatja ose ndryshimi, rikthimi, konsultimi, përdorimi, përhapja me anë të transmetimit, shpërndarjes ose vënies në dispozicion në ndonjë mënyrë tjetër, lidhja ose kombinimi, kufizimi, fshirja ose shkatërrimi.
  • “E dhëna personale”
    është çdo informacion në lidhje me një subjekt të dhënash.
  • “Të dhëna sensitive”
    janë kategori të veçanta të të dhënave personale, që zbulojnë origjinën racore ose etnike, mendimet politike, besimin fetar ose pikëpamjet filozofike, anëtarësimin në sindikata, të dhënat gjenetike, të dhënat biometrike, të dhënat për shëndetin, jetën ose orientimin seksual të një personi.
  • “Të dhëna biometrike”
    janë të dhënat personale, që rezultojnë nga përpunimi teknik specifik i karakteristikave fizike, fiziologjike ose të sjelljes së një personi, të cilat bëjnë të mundur, ose konfirmojnë identifikimin unik të atij personi, siç janë imazhet e fytyrës ose gjurmët daktiloskopike.
  • “Të dhënë gjenetike”
    janë të dhënat personale, që kanë të bëjnë me karakteristikat gjenetike të trashëguara ose të fituara të një personi, të cilat japin informacion unik lidhur me fiziologjinë ose shëndetin e tij e që përftohen, veçanërisht, si rezultat i analizës së një kampioni biologjik të marrë nga ai person.
  • “Të dhëna për shëndetin”
    janë të dhënat personale për shëndetin fizik ose mendor të një personi, duke përfshirë dhënien e shërbimeve të kujdesit shëndetësor, që tregon informacionin në lidhje me gjendjen e tij ose të saj shëndetësore.
  • “Të dhëna penale”
    janë të dhënat personale në lidhje me dënimet penale, veprat penale dhe masat e sigurimit të lidhura me to.
  • “Të dhëna të anonimizuara”
    janë të dhëna, të cilat kanë qenë fillimisht të dhëna personale, por janë përpunuar në mënyrë të tillë që nuk është më e mundur që një person fizik ose juridik t’ia atribuojë këto të dhëna një personi fizik të identifikuar ose të identifikueshëm.

LIDHJE

KONTAKT


  • Rr. “Abdi Toptani”, Nd. 5,
    Kodi postar 1001, Tiranë
  • +355 42 23 7200
  • Nr. i Gjelbër: 08002050
  • info@idp.al

VENDNDODHJA


Copyright 2025 IDP, Të gjitha të drejtat të rezervuara

Politikat e Privatësisë