|

Komisioneri për të Drejtën e Informimit dhe Mbrojtjen e të Dhënave Personale është autoriteti përgjegjës për mbrojtjen, mbikëqyrjen dhe promovimin e së drejtës për ripërdorim të dokumenteve sipas ligjit nr.33/2022 “Për të Dhënat e Hapura dhe Ripërdorimin e Informacionit të Sektorit Publik”.

Kompetencat e Komisionerit për të Drejtën e Informimit dhe Mbrojtjen e të Dhënave Personale (në vijim “Komisioneri”) në fushën e të dhënave të hapura dhe ripërdorimit të informacionit të sektorit publik parashikohen në kreun VI “Kompetencat e Procedurat për Shqyrtimin e Ankesave”’, në nenin 19, të ligjit nr. 33/2022.

Sipas kësaj dispozite, Organet e sektorit publik duhet të bashkëpunojnë me Komisionerin duke i dhënë të gjithë informacionin që ai kërkon për përmbushjen e detyrave të tij të përcaktuara në ligj.

Një kompetencë dhe përgjegjësi e rëndësishme e Komisionerit është procedura e shqyrtimit të ankesave, përcaktuar në nenin 20 të ligjit nr. 33/2022. Nëse palët e interesuara vlerësojnë se organi i sektorit publik ose sipërmarrja publike ka cenuar të drejtën e tyre për ripërdorim të dokumenteve sipas parashikimeve të këtij ligji, ato kanë të drejtë të ankohen në rrugë administrative pranë Komisionerit në përputhje me ligjin dhe Kodin e Procedurave Administrative.

Ankimi administrativ pranë Komisionerit bëhet brenda 30 ditësh pune nga dita kur:

    a) ankuesi ka marrë njoftim për refuzimin e ripërdorimit të dokumenteve;

    b) ka kaluar afati i parashikuar në këtë ligj për dhënien e dokumentit për ripërdorim.

Komisioneri brenda 30 ditësh pune nga dita kur është dorëzuar ankimi vendos:

    a) mospranimin e ankesës kur:

          i. ka kaluar afati i parashikuar;

          ii. ankimi nuk paraqitet në formë shkresore;

         iii. nuk tregohet emri dhe adresa e ankuesit.

    b) pranimin e ankesës dhe urdhërimin e organit të sektorit publik ose të sipërmarrjes publike për të vënë në dispozicion dokumentin e kërkuar për ripërdorim në mënyrë të plotë ose të pjesshme;

    c) rrëzimin e ankesës, pjesërisht ose tërësisht;

    ç) afatin brenda të cilit organi i sektorit publik ose sipërmarrja publike duhet të zbatojë urdhrin.

Nëse Komisioneri nuk merr vendim përpara mbarimit të afatit të parashikuar në pikën 3 të nenit 20, ankuesit i lind e drejta për t’iu drejtuar gjykatës.

Të gjitha palët e prekura nga vendimi i Komisionerit kanë të drejtën të ankimojnë këtë vendim në gjykatën administrative të shkallës së parë Tiranë, sipas nenit 21.